Azərbaycan Seulda beynəlxalq dövlət müəssisələri konfransına qatılıb

Maliyyə Nazirliyinin nümayəndə heyəti Dünya Bankının dəvəti ilə Cənubi Koreyanın paytaxtı Seulda keçirilən "Dövlət müəssisələrinin qlobal konfransı" adlı beynəlxalq tədbirdə iştirak edib.

"The Daily Baku" bu barədə nazirliyə istinadən xəbər verir.

Məlumata görə, dövlət maliyyə idarəetməsi sahəsində müxtəlif ölkələrin hökumət nümayəndələri, dövlət müəssisələrinin rəhbərləri, beynəlxalq maliyyə institutları və Koreyanın müvafiq qurumlarının yüksək səviyyəli təmsilçilərinin qatıldığı konfrans dövlət maliyyə idarəçiliyi sahəsində əməkdaşlığın gücləndirilməsi və peşəkar təcrübə mübadiləsinin həyata keçirilməsi məqsədilə keçirilib.

Tədbirdə Maliyyə Nazirliyi yanında Dövlət Müəssisələrinin Monitorinqi Agentliyinin direktoru Fərid Baxşıyev "Azərbaycanda mərkəzləşdirilmiş monitorinq sisteminin tətbiqi" mövzusunda təqdimatla çıxış edərək ölkəmizin bu sahədə əldə etdiyi nailiyyətlər və tətbiq olunan yanaşmalar barədə məlumat verib, iştirakçıların suallarını cavablandırıb.