Çernobıl bölgəsində yanğının söndürülməsi üçün tədbirlər görülür

Çernobıl Atom Elektrik Stansiyasının (AES) təcrid zonasında irimiqyaslı meşə yanğını qeydə alınıb.

"The Daily Baku" xəbər verir ki, bu barədə Ukraynanın Dövlət Fövqəladə Hallar Xidmətinin (DFHX) rəsmi "Telegram" kanalında məlumat yayılıb.

Qurumun açıqlamasına əsasən, hazırda həmin ərazidə güclü yanğının lokallaşdırılması istiqamətində işlər aparılır. Bildirilir ki, alov artıq 1100 hektarı aşan meşəlik ərazini bürüyüb.

"Küləyin güclü olması yanğının qısa müddətdə yeni sahələrə keçməsinə şərait yaradır", - deyə xəbərdə qeyd edilir.

Çernobıl qəzasından sonra təsirə məruz qalmış zonada yanğınsöndürmə briqadaları tərəfindən alovun qarşısının alınması əməliyyatları davam etdirilir. Fəsadların aradan qaldırılması və ehtimal olunan nəticələr haqqında hələlik əlavə təfərrüat verilməyib.