Günümüzün ən geniş yayılan trendlərindən biri: Bakıda kafe-şop mədəniyyəti

Bakıda kafe-şop bazarı artıq formalaşmış və eyni zamanda inkişaf etməkdə olan seqmentlərdən biridir. Şəhər həyatının sürətlənməsi, ofisdən kənar iş modelinin yayılması və sosiallaşma ehtiyacının artması bu sahəni davamlı və tələbatlı biznes istiqamətinə çevirib. Bu gün kafe-şop açmaq ideyası təkcə “qəhvə satmaq” deyil, düzgün konsept, düzgün auditoriya və düzgün lokasiya seçimi deməkdir.

Bazarda tələbat əsasən üç fərqli müştəri davranışı üzərində formalaşır. Birinci qrup sürətli səhər qəhvəsi və gün ərzində iş üçün gələn müştərilərdir. Bu auditoriya keyfiyyətli qəhvə, stabil dad və sakit mühit axtarır. United Coffee Beans, Gloria Jean’s kimi formatlı məkanların uğuru göstərir ki, yüksək keyfiyyətli məhsul və sadə menyu ilə belə sabit müştəri bazası yaratmaq mümkündür. Bu modeldə dövriyyə çoxluqdan deyil, davamlılıqdan qazanılır.

İkinci və daha geniş auditoriya desert və rahat oturuş mədəniyyətinə üstünlük verən müştərilərdir. Bu seqmentdə interyer, vitrin, servis və vizual təqdimat birbaşa satışa təsir edir. Çizkeyk, kruassan, ekler və aromalı latte-lər Bakıda ən çox satılan məhsullar sırasındadır. Biznes baxımından bu modelin üstünlüyü odur ki, marja nisbətən yüksəkdir və məhsullar impulsiv alışa uyğundur. Risk isə rəqabətin çoxluğu və davamlı yenilənmə tələbatıdır. Köşe Kahve kimi konsept kafelər bu tələbatı rahatlıqla qarşılaya bilir.  

Üçüncü istiqamət isə geniş menyulu, uzun oturuşa uyğun kafe-restoran formatıdır. Cafecity tipli modellər göstərir ki, Bakıda insanlar bir məkanda həm qəhvə, həm yemək, həm də görüş keçirmək istəyir. Bu model daha böyük investisiya tələb etsə də, gündəlik dövriyyə və müştəri axını baxımından daha stabil görünür. Burada əsas biznes riski xərclərin yüksək olması və personal idarəçiliyidir.

Son illər bazarda diqqət çəkən yeni trend “konseptual kafelər”dir. Yaşıl interyer, sakit atmosfer, sağlam menyu və alternativ içkilər üzərində qurulan bu məkanlar hələ tam formalaşmış bazar deyil. Bitki əsaslı süd, şəkərsiz desertlər xüsusilə gənc və orta yaşlı auditoriya arasında populyarlıq qazanır. Bu seqmentdə düzgün məkan seçmək ilə nisbətən kiçik səmtlərdə belə effektiv biznes qurmaq mümkündür.

Bakıda kafe biznesində uğurun əsas faktorlarından biri lokasiyadır. Mərkəzi küçələr, biznes mərkəzlərinə yaxın ərazilər və piyada axını olan zonalar daha sürətli geri dönüş vəd edir. Bununla yanaşı, yaşayış massivlərində “local café” formatı da potensial daşıyır, çünki insanlar evə yaxın, sakit və tanış məkanlara üstünlük verməyə başlayıb.

Qiymət siyasəti bazarda həlledici faktor deyil. Müştərilər daha çox rahatlıq, atmosfer və təcrübə axtarır. Bu səbəbdən brend dili, interyer konsepti və xidmət üslubu birbaşa satış göstəricilərinə təsir edir. Güclü brend hekayəsi olan kafelər daha sürətli yadda qalır və loyallıq yaradır.

"The Daily Baku" redaksiyası