BMT İsrail Müdafiə Ordusunun (IDF) "Hizbullah" qruplaşmasına qarşı əməliyyatı çərçivəsində döyüşlərin getdiyi Livan üçün tələb olunan humanitar yardımın həcmini iki dəfədən çox artırıb.
"The Daily Baku"nun məlumatına görə, bu barədə "The Times of Israel" qəzeti BMT Humanitar Məsələlərin Əlaqələndirilməsi İdarəsinə (OCHA) istinadən xəbər verir.
Təşkilatın hesablamalarına görə, yaxın altı ay ərzində ölkəyə təxminən 640 milyon dollar lazım olacaq.
"Livandakı humanitar böhran dərinləşməkdə davam edir", – məlumatda qeyd olunub.
Sənədə əsasən, əhalinin təkrar köçürülməsi, sığınacaqların çatışmazlığı və evlərə təhlükəsiz qayıdış imkanlarının məhdudluğu əhalinin həssaslığını artırır. BMT xəbərdarlıq edir ki, zərərçəkənlərin böhranla mübarizə imkanları sürətlə tükənir, əsas xidmətlərin yükü isə artmağa davam edir.
Martda BMT Livan hökumətinin genişmiqyaslı fövqəladə əməliyyatının dəstəklənməsi üçün mayın sonunadək 308 milyon dollar tələb etmişdi. Təşkilat avqustun sonunadək əlavə daha 331 milyon dollara ehtiyacın olacağını bildirib.
© 2026 The Daily Baku. Bütün hüquqlar qorunur.