Pakistan Yaxın Şərqdə münaqişənin həlli üçün səylərini davam etdirir

Pakistanın İnsan Hüquqları Nazirliyinin parlament katibi Saba Sadiq Yaxın Şərq regionunda münaqişənin dayandırılması istiqamətində ölkəsinin səylərini davam etdirdiyini bildirib.

"The Daily Baku" xəbər verir ki, o, Bakıda tələbələrlə görüş zamanı deyib ki, İslamabad tərəflər arasında dialoqun qurulması üçün fəal şəkildə çalışır.

“Biz tərəflərin danışıqlar masası arxasında əyləşməsini təmin etmək üçün çalışmışıq. Müxtəlif regionlardan olan ölkələr bu prosesi dəstəkləyib. Rəqib və qarşı-qarşıya duran iki dövlət bir araya gələrək dialoqa başlaya bilib. Bu, birgə səylər və əməkdaşlıq ruhu sayəsində mümkün olub. Tərəflər danışıqlar aparıb, lakin təbii ki, hələ yekun razılaşmaya nail olunmayıb”, – deyə Sadiq bildirib.

O qeyd edib ki, ABŞ-ın da iştirakı ilə davam edən proses gələcəkdə konkret nəticələr verə bilər.

Sadiq əlavə edib ki, Pakistan müsəlman ölkəsi olaraq regionda eskalasiyanın qarşısının alınması və münaqişənin sona çatdırılması üçün səylərini davam etdirir.