Tural Gəncəliyev: Qarabağ və Şərqi Zəngəzur dövlətin əsas prioriteti olaraq qalır

Cənab Prezident İlham Əliyevin Ağdərə və Tərtər rayonlarına son səfəri işğaldan azad edilmiş ərazilərdə aparılan bərpa və yenidənqurma proseslərinin dövlət başçısının birbaşa nəzarətində olduğunu bir daha təsdiqləyir.

The Daily Baku xəbər verir ki, bunu Milli Məclisin deputatı Tural Gəncəliyev deyib.

Onun  sözlərinə görə, Prezidentin Qarabağ və Şərqi Zəngəzura mütəmadi səfərləri, bərpa-quruculuq işləri ilə şəxsən tanış olması və mühüm strateji infrastruktur layihələrinin açılışında iştirak etməsi göstərir ki, dövlət siyasətinin mərkəzində məhz bu regionların yenidən qurulması dayanır.” Qarabağda və Şərqi Zəngəzurda həyata keçirilən bütün proseslər dövlət başçısının birbaşa tapşırıqları və nəzarəti ilə icra olunur.

Tural Gəncəliyev bildirib ki, “Qozlukörpü” su elektrik stansiyasının istifadəyə verilməsi Qarabağ və Şərqi Zəngəzurun strateji ehtiyaclarının – qaz, elektrik enerjisi, su təminatının və əhalinin geri qayıdışının əsasını təşkil edən infrastrukturun prioritet olaraq bərpa edildiyini açıq şəkildə nümayiş etdirir. 

Onun sözlərinə görə, bu yanaşma insanların təhlükəsiz və dayanıqlı şəkildə doğma yurdlarına qayıtmasını təmin edən əsas amillərdəndir.

Deputat qeyd edib ki, bu günədək Qarabağ və Şərqi Zəngəzurun bərpasına 25 milyard manatdan artıq vəsait yönəldilib. Bu, Azərbaycanın iqtisadi gücünün və dövlətin bu ərazilərə göstərdiyi xüsusi diqqətin bariz göstəricisidir. Müharibədən çıxmış, tamamilə dağıdılmış ərazilərin qısa müddət ərzində bərpa edilməsi həm regional, həm də qlobal miqyasda nadir nümunədir.

“Dünyanın müxtəlif bölgələrində müharibələrin, dağıntıların davam etdiyi bir dövrdə Azərbaycan Qarabağ və Şərqi Zəngəzurda apardığı quruculuq siyasəti ilə beynəlxalq ictimaiyyət üçün nümunə yaradır. Xarici qonaqların bu ərazilərə səfərləri zamanı gördükləri mənzərə onları səmimi şəkildə heyrətləndirir. Mən bunu dəfələrlə şəxsən müşahidə etmişəm”, – deyə deputat vurğulayıb.

Tural Gəncəliyev əlavə edib ki, Qarabağ və Şərqi Zəngəzurun ölkənin ümumi iqtisadi və enerji sisteminə inteqrasiyası prosesi artıq yekunlaşmaq üzrədir. Bu regionların azad edilməsi Azərbaycanın su və enerji ehtiyatlarının artmasına, nəqliyyat və kommunikasiya xətlərinin genişlənməsinə mühüm töhfə verir.

“Orta Dəhlizin əsas komponentlərindən biri olan TRİPP marşrutunun məhz işğaldan azad edilmiş ərazilərdən keçməsi, yeni hava limanlarının istifadəyə verilməsi və dəmir yolu xətlərinin çəkilməsi bu bölgənin beynəlxalq nəqliyyat və kommunikasiya xəritəsində strateji əhəmiyyətini daha da artırır.”

Deputat bildirib ki, həyata keçirilən bütün bu layihələr Qarabağ və Şərqi Zəngəzurun yalnız Azərbaycanın deyil, bütövlükdə regionun inkişafında mühüm rol oynadığını təsdiqləyir və bu əraziləri beynəlxalq geostrateji mərkəzlərdən birinə çevirir.