Elnara Ansari sosial müdafiə siyasəti ilə bağlı açıqlama verib

Azərbaycanda elektron və təmassız əlillik qiymətləndirmə sistemi yaradılıb. Rəqəmsal əlillik altsistemi vasitəsilə tibbi məlumatlar elektron qaydada emal olunur, qərarlar isə şəffaf və operativ şəkildə qəbul edilir

Bunu DOST İnklüziv İnkişaf və Yaradıcılıq Mərkəzinin direktoru və QHT-lərə Dövlət Dəstəyi Agentliyinin Müşahidə Şurasının üzvü Elnara Ansari Wuf13-ün III günü çərçivəsində keçirilən "Əlilliyi olan şəxslər üçün müstəqil həyat və inklüziv şəhərlər" mövzusuna həsr edilmiş tədbirdə deyib. O qeyd edib ki, Azərbaycan regionda belə sistemi tətbiq edən ilk ölkələrdən biridir:

"Əlilliyi olan şəxslərin sosial müdafiəsi və hüquqlarının təmin edilməsi Azərbaycanda həyata keçirilən sosial siyasətin əsas istiqamətlərindən biridir.

2018-ci ildə "Əlilliyi olan şəxslərin hüquqları haqqında" Qanun qəbul edilib. Sənəd bərabər hüquqların, reabilitasiyanın, məşğulluğun və sosial inklüzivliyin təmin olunması üçün güclü hüquqi baza yaradıb".

E.Ansari vurğulayıb ki, həmçinin sosial ödənişlər vətəndaşlardan heç bir müraciət və sənəd tələb olunmadan proaktiv şəkildə təyin edilir:

"Proaktiv sosial xidmət modeli artıq beynəlxalq səviyyədə tanınıb və digər ölkələr tərəfindən öyrənilir.

Bütün bunlarla bərabər inklüziv və əlçatan şəhərlər konsepsiyasının təşviq edilir. Əlçatanlıq yalnız fiziki infrastrukturla məhdudlaşmır. Bu, həyatın bütün sahələrində bərabər iştirakın təmin olunması deməkdir. 2021-ci ildə qəbul edilmiş infrastrukturun məqsədəuyğun uyğunlaşdırılması qaydaları bütün dövlət və özəl qurumlar üçün nəqliyyat, kommunikasiya, mədəniyyət və ictimai xidmətlər sahəsində əlçatanlığın təmin edilməsini tələb edir.

Bundan əlavə, 2019-cu ildə əlilliyi olan şəxslər üçün iş yerləri standartları qəbul edilib, inklüziv məşğulluğun dəstəklənməsi və əmək bazarında uyğunlaşdırma ehtiyaclarının monitorinqi məqsədilə rəqəmsal sistem hazırlanıb".