Nəsimi rayonunda körpələr üçün Yeni il şənliyi təşkil olunub

Nəsimi rayonu, 1 nömrəli körpələr evində Yeni il münasibətilə bayram tədbiri keçirilib. “Kiçik mələklərin qış nağılı” adlı şənlik Səhiyyə Nazirliyinin dəstəyi ilə təşkil olunub.

"The Daily Baku"  xəbər verir ki, tədbir körpələr üçün əsl bayram  və sevgi ovqatında keçib . Balacalar müxtəlif rəqs və musiqi nömrələri ilə çıxış edib, səhnəciklər nümayiş etdiriblər.

Körpələr evinin baş həkimi Dürdanə Budaqova bildirib ki, müəssisənin fəaliyyəti dövlətin sosial siyasətinin əsas istiqamətlərindən biri olan uşaqların sağlamlığının qorunmasına xidmət edir. Onun sözlərinə görə, körpələrin təhlükəsiz, sağlam və qayğı dolu mühitdə böyüməsi kollektivin əsas prioritetidir.

Baş həkim çıxışında dövlət tərəfindən göstərilən sosial dəstəyə də toxunaraq bildirib ki, Prezident İlham Əliyevin müvafiq sərəncamına əsasən 1 nömrəli Körpələr evində çalışan əməkdaşların əməkhaqları 1,5–3 dəfə artırılıb.

Baş həkim qeyd edib ki, Heydər Əliyev Fondunun prezidenti Mehriban Əliyeva və Fondun vitse-prezidenti Leyla Əliyeva körpələr evlərinə daim xüsusi diqqət və qayğı göstərirlər. O vurğulayıb ki, burada çalışan əməkdaşlar öz peşə borclarını böyük məsuliyyət və fədakarlıqla yerinə yetirirlər: “Burada çalışan hər bir əməkdaş uşaqlara təkcə tibbi xidmət göstərmir, eyni zamanda onlara ana qayğısı, sevgi və diqqət bəxş edir. Gecə-gündüz körpələrimizin yanında olan əməkdaşlarımızın zəhməti əvəzsizdir”.

O, Səhiyyə Nazirliyinə və aidiyyəti qurumlara göstərilən diqqət və dəstəyə görə təşəkkürünü ifadə edib.

O, həmçinin 31 Dekabr – Dünya Azərbaycanlılarının Həmrəylik Günü və Yeni il münasibətilə kollektiv üzvlərini və körpələri təbrik edib, onlara sağlam və xoşbəxt gələcək arzulayıb.

Tədbirin bədii hissəsində körpələr evinin sakinlərinin ifasında milli və xarici rəqslər, səhnə kompozisiyaları nümayiş olunub. Şaxta baba və Qar qızın səhnəyə çıxışı uşaqlar tərəfindən böyük sevinc və alqışlarla qarşılanıb. Bayram qəhrəmanları balacalara hədiyyələr təqdim edib, yeni il yolkasının ətrafında onlarla birlikdə rəqs ediblər.